Urusi iliwazuilia zaidi ya watu 5,000 waliokuwa wakipinga shambulizi la Rais Vladimir Putin dhidi ya Ukraine katika miji kadhaa siku ya Jumapili — idadi ambayo haijawahi kushuhudiwa huku Moscow ikikabiliana na mtu yeyote anayepinga mashambulizi ya kijeshi ya Kremlin dhidi ya nchi hiyo.
OVD-info, ambayo inafuatilia shughuli za kukamatwa kwa watu wakati wa maandamano, ilisema polisi wamewazuilia watu wasiopungua 5,016 katika miji 60 wakati wa maandamano ya kupinga vita.
Hiyo ilikuwa idadi kubwa ya waandamanaji waliokamatwa katika siku moja na kubwa zaidi ya watu waliokamatwa wakati wa wimbi la maandamano yaliyozuka nchini humo mwaka jana wakati kiongozi wa upinzani Alexei Navalny alipofungwa gerezani.
Navalny ametoa wito kwa Warusi kupinga vita katika ombi lake akiwa gerezani.
Waandamanaji wanaweza kuhukumiwa kifungo kwa kushiriki maandamano ya kupinga mashambulizi hayo.
OVD-info ilisema watu 2,394 walikamatwa huko Moscow.
Watu 1,253 walikamatwa mjini Saint Petersburg, mfuatiliaji alisema.
Maandamano pia yalifanyika katika miji midogo katika mikoa ya Urusi.
Wanaharakati kadhaa walichapisha video za kukamatwa kwa watu kwenye mitandao ya kijamii.
OVD-info ilisema polisi walikuwa wametumia shoti za umeme dhidi ya waandamanaji.
Maandamano ya kupinga vita nchini Urusi yameendelea licha ya onyo kutoka kwa mamlaka na hatari ya kufungwa jela.
Ili kukomesha ukosoaji zaidi, Putin mnamo Ijumaa alitia saini kuwa sheria mswada unaoanzisha vifungo vya hadi miaka 15 kwa habari za uwongo kuhusu jeshi la Urusi.
Mswada huo unaainisha masharti ya vifungo tofauti na faini dhidi ya watu wanaochapisha “habari za uwongo” kuhusu jeshi.
Putin pia alitia saini mswada ambao utaruhusu faini au kifungo cha hadi miaka mitatu jela kwa mtu yeyote kutaka vikwazo viwekwe dhidi ya Urusi huku Moscow ikikabiliwa na adhabu kali za kiuchumi kutoka kwa miji mikuu ya Magharibi kutokana na uvamizi huo.