Polisi wa Senegal waliziba njia ya kuelekea nyumbani kwake kiongozi wa upinzani Ousmane Sonko baada yake kuitisha maandamano siku ya Ijumaa, wakati nchi hiyo ikiwa katika mvutano wa kabla ya uchaguzi.
Barabara zinazoelekea nyumbani kwa Sonko katika mji mkuu wa Dakar zilifungwa na vizuizi vya polisi waliokuwa wamevalia zana za kuzuia ghasia, na wafuasi waliojaribu kufika karibu na jengo hilo waliambiwa warudi nyuma.
Sonko alikuwa ameitisha maandamano siku ya Ijumaa kupinga uamuzi wa kuzuia orodha ya wagombea katika uchaguzi wa wabunge wa Senegal Julai 31 — hatua ambayo pia inampiga marufuku yeye na viongozi wengine wa upinzani kushiriki uchaguzi.
Sonko na washirika wake wameapa kuendeleza maandamano siku ya Ijumaa, licha ya marufuku ya maandamano yaliyotangazwa na rais kwa misingi ya utulivu wa umma.
“Maandamano yanaendelea, bila shaka yatafanyika,” Ousseynou Ly, msemaji wa chama cha Sonko cha PASTEF, alisema.
Baadhi ya viongozi wameomba mazungumzo yafanyike, wakikumbuka ghasia zilizozuka Machi mwaka jana, zikigharimu maisha ya makumi ya watu, baada ya Sonko kutuhumiwa kwa unyanyasaji wa kijinsia.
Orodha ya wagombea, iliyotolewa na muungano wa upinzani uitwao Yewwi Askan Wi, iliondolewa kwenye orodha ya wagombea nyadhfa kwa amri ya wizara ya mambo ya ndani kwa misingi ya kutotimiza masharti.
Mahakama ya juu zaidi nchini, Baraza la Katiba ilithibitisha uamuzi wa wizara hiyo.
Senegal ina sifa ya muda mrefu kama nchi yenye utulivu eneo la Afrika Magharibi, ambapo machafuko ya kisiasa ni ya kawaida.
Bunge lina viti 165.
Kati ya hao, 53 wamechaguliwa kwa misingi ya orodha ya kitaifa na 97 kwa msingi wa kura nyingi kati ya idara za nchi, wakati 15 wamechaguliwa na wanadiaspora wa Senegal.
Marufuku ya orodha ya Yewwi Askan Wi inatumika haswa kwa wagombea wa viti vinavyogombewa na orodha za kitaifa.
Muungano bado unaweza kushindana kwa kutumia wagombeaji mbadala.
Sonko anasema marufuku iliyowekewa chama chake ni matokeo ya kuingiliwa kisiasa, shtaka lililokataliwa na serikali.
Wapinzani wengine wawili mashuhuri wa Rais Macky Sall — meya wa zamani wa Dakar Khalifa Sall, ambaye hana uhusiano na mkuu wa nchi, na waziri wa zamani Karim Wade, mwanawe rais wa zamani – wameshuhudia umaarufu wao wa kisiasa ukipunguzwa na kesi za kisheria.