Mwigizaji maarufu wa Kenya, Winnie Ndubi Bwire, anayejulikana kwa jina “Dida” kwenye kipindi Sultana cha runinga ya Citizen, amefariki dunia. Familia yake imethibitisha kifo chake siku ya Alhamisi, tarehe 5 Septemba 2024, wakati akipokea matibabu ya saratani nchini Uturuki.

Katika taarifa familia yake ilisema, “Tunasikitika kutangaza kifo cha Winfred Bwire Ndubi ambaye alishindwa kwenye vita dhidi ya saratani leo Septemba 5 2024 wakati akitibiwa nchini Uturuki.”

Winnie alikuwa akipambana na saratani ya matiti kwa miaka miwili iliyopita. Mwezi mmoja kabla ya kifo chake, aliomba msaada wa kifedha ili kuchangisha Ksh milioni 5 kwa ajili ya matibabu yake nje ya nchi. Katika video yake ya mwisho, iliyochapishwa tarehe 14 Agosti, alieleza changamoto alizokutana nazo kutokana na athari mbaya za matibabu yake.

Licha ya changamoto hizo, Winnie alibaki na matumaini, akiishukuru jamii kwa maombi na msaada wa kifedha.

Familia yake imeahidi kutoa maelezo zaidi hivi karibuni.