Jean-Marie Le Pen, kiongozi wa kihistoria wa vuguvugu la siasa kali za mrengo wa National Front nchini Ufaransa, amefariki dunia akiwa na umri wa miaka 96.
Le Pen, ambaye alikuwa chini ya uangalizi mkali wa matibabu nyumbani kwake, alifariki dunia adhuhuri (1100 GMT) Jumanne “akiwa amezungukwa na wapendwa wake”, familia ilisema katika taarifa.
Le Pen alikuwa mwanasiasa wa mrengo wa kulia nchini Ufaransa na mwanzilishi wa chama cha National Front (sasa kinajulikana kama National Rally).
Alizaliwa tarehe 20 Juni 1928 huko La Trinité-sur-Mer, Brittany, na alifariki dunia tarehe 7 Januari 2025 akiwa na umri wa miaka 96.
Le Pen alikuwa maarufu kwa misimamo yake mikali dhidi ya uhamiaji na utamaduni wa tamaduni nyingi, na mara nyingi alitoa matamshi yenye utata kuhusu masuala ya kijamii na kisiasa.
Alikuwa na ushawishi mkubwa katika siasa za Ufaransa, ingawa mara nyingi alikosolewa kwa matamshi yake ya kibaguzi na ya chuki.
Katika maisha yake ya kisiasa, Le Pen alihudumu kama mbunge wa Bunge la Ulaya na Bunge la Kitaifa la Ufaransa.
Vile vile, Le Pen alijaribu kugombea urais mara tano, na mara moja aliingia katika duru ya pili ya uchaguzi wa urais mwaka 2002, jambo lililoshangaza wengi.
Jean-Marie Le Pen alijaliwa na watoto watatu na mke wake wa kwanza, Pierrette Lalanne. Watoto wake ni Marie-Caroline Le Pen, Yann Le Pen, na Marine Le Pen.
Marine Le Pen alichukua uongozi wa chama cha National Front kutoka kwa baba yake mwaka 2011 na baadaye kukibadilisha jina kuwa National Rally.
Marine Le Pen amekuwa kiongozi maarufu wa kisiasa nchini Ufaransa na amegombea urais mara kadhaa. Pia, mjukuu wake, Marion Maréchal, ni mwanasiasa anayejulikana na amekuwa na ushawishi mkubwa katika siasa za mrengo wa kulia nchini Ufaransa.
Kifo chake Jean-Marie Le Pen kinaashiria mwisho wa sura muhimu na yenye mgawanyiko katika siasa za Ufaransa.
