Mahakama ya Pakistan imemhukumu kifo mwanamke Mwislamu baada ya kumpata na hatia ya kukufuru kwa kumtusi Mtume Muhammad katika jumbe alizotuma kwa rafiki yake, afisa mmoja alisema Alhamisi.
Mwanamke huyo, Aneeqa Atteeq, alikamatwa Mei 2020 baada ya mwanamume huyo kuwaarifu polisi kwamba alimtumia picha za Mtume – zinazochukuliwa kuwa za kufuru – kupitia WhatsApp.
Chini ya sheria za kukufuru za Pakistan, yeyote atakayepatikana na hatia ya kukashifu dini au watu wa dini anaweza kuhukumiwa kifo. Ingawa mamlaka bado haijatoa hukumu ya kifo kwa kukufuru, shutuma tu zinaweza kusababisha ghasia nchini humo.
Kwa mujibu wa amri ya mahakama, mwanamke huyo pia alihukumiwa kifungo cha miaka 10 jela.
Awais Ahmed, afisa wa serikali, alisema mahakama ilitangaza uamuzi huo dhidi ya Atteeq siku ya Jumatano katika mji wa Rawalpindi.
Mashirika ya ndani na ya kimataifa ya haki za binadamu yanasema madai ya kukufuru mara kwa mara yamekuwa yakitumiwa kuwatisha watu wa dini ndogo na kutatua masuala ya kibinafsi.
Mwezi Disemba, kundi la Waislamu lilivamia kiwanda cha vifaa vya michezo katika wilaya ya Sialkot nchini Pakistan, na kumuua mwanamume wa Sri Lanka na kuchoma mwili wake hadharani kwa madai ya kukufuru.
Tukio hilo lilizua shutuma nchini kote na mamlaka iliwakamata makumi ya watu kwa kuhusika katika mauaji ya Priyantha Kumara. Wale waliohusishwa na mauaji ya Kumara wanakabiliwa na kesi nchini Pakistan.
