Waziri wa Mambo ya Nje wa China Wang Yi Jumatatu alisisitiza kwamba urafiki kati ya Beijing na Moscow bado ni thabiti sana, licha ya mataifa mengi kulaani uvamizi wa Urusi unaoendelea Ukraine, alisema China iko tayari kusaidia upatanishi wa amani.

Beijing imejipata katika hali ngumu ya kidiplomasia katika kipindi chote cha mzozo huo, ikikataa kulaani mshirika wake wa karibu Moscow.

“Urafiki kati ya nchi hizo mbili ni thabiti, na matarajio ya ushirikiano wa pande zote mbili ya siku zijazo ni makubwa sana,”Wang alisema katika mkutano na waandishi wa habari wa kila mwaka.

“Lakini alisema China ilikuwa “tayari kufanya kazi na jumuiya ya kimataifa kuleta upatanishi unaohitajika, inapobidi.”

Mkuu wa sera za kigeni wa Umoja wa Ulaya Josep Borrell alisema wiki iliyopita kwamba China inapaswa kuwa mpatanishi wa mazungumzo ya amani ya siku zijazo kati ya Urusi na Ukraine kwani mataifa ya Magharibi hayawezi kutekeleza jukumu hilo, katika mahojiano na gazeti la kila siku la Uhispania la El Mundo.

Beijing imesema mara kwa mara itachukua “jukumu la kujenga katika wito wa mazungumzo” kutatua mgogoro huo, lakini haijajitolea hapo awali kujiunga au kuandaa mazungumzo yoyote ya amani.

Wang pia alisema China itatuma msaada wa kibinadamu kwa Ukraine.

Pia aliutaja uhusiano wa China na Urusi kuwa “uhusiano muhimu zaidi,” ambao “unaleta amani, utulivu na maendeleo duniani”.

Waziri huyo wa mambo ya nje alitaja ahadi ya ushirikiano ya mwezi uliopita kuwa “ikionyesha dunia kwa uwazi na bila kosa” kwamba nchi zote mbili “zinapinga kwa pamoja kufufua fikra za Vita Baridi na kuzua makabiliano ya kiitikadi”.

Wang pia alisema muungano huo “hautakubali kuingiliwa na mataifa mengine”, katika onyo kwa Amerika na washirika wake wa Magharibi ambao katika siku za hivi karibuni wameishawishi China kuchukua jukumu kubwa zaidi katika upatanishi wa mzozo huo.