Kiongozi wa Azimio la Umoja Raila Odinga amesema hakuna ubaya kuwa na maandamano akisema jambo pekee ambalo si sahihi ni ukatili wa polisi.

Raila ambaye alikuwa akizungumza Alhamisi kwenye Kongamano la Ugatuzi alikuwa akijibu matamshi ya Gavana wa Uasin Gishu Jonathan Bii.

Bii katika hotuba yake alisema walikuwa na maandamano yao mashambani kwani wapinzani walikuwa mitaani na sufuria vichwani.

Raila alipuuzilia mbali matamshi ya Bii akibainisha kuwa anafaa kufahamu kuwa hata katiba ni matokeo ya maandamano.
“Nataka nirejelee kile ambacho Mkuu wa Mkoa alisema hivi punde kwamba wanatarajia mavuno mengi kwa sababu walifanya maandamano mashambani badala ya mitaani wakiwa na sufuria kichwani. Nataka nimwambie katiba tuliyonayo leo ni zao la maandamano,” Raila alisema.

Kiongozi huyo wa Azimio alisema zaidi kwamba ikiwa maandamano yanaweza kuleta suluhu kwa walioathiriwa na sakata ya Finland basi ni sawa.

“Ninataka kumkumbusha kwamba ikiwa maandamano yanaweza kusaidia familia ambazo zilidanganywa kuhusu watoto wao kupelekwa Finland, hakuna ubaya na maandamano. Kilicho mbaya ni ukatili wa polisi,” Raila alisema.