Watu nchini Indonesia wanaofanya mapenzi nje ya ndoa wanaweza kufungwa jela mwaka mmoja ikiwa maafisa wataidhinisha mabadiliko makubwa ya kanuni za uhalifu nchini kama inavyotarajiwa Jumanne.
Pamoja na kuharamisha uzinzi, kanuni iliyorekebishwa ingepiga marufuku watu wasiofunga ndoa kuishi pamoja.
Sheria hiyo, ikiwa itapitishwa, itatumika kwa raia wa Indonesia na wageni sawa, ikiwa ni pamoja na watalii katika maeneo ya Bali na visiwa vilivyo karibu na Lombok.
Kumtusi rais na kueneza maoni yanayopingana na itikadi ya kitaifa ya kilimwengu, inayojulikana kama Pancasila, pia kutaharamishwa.
Wataalamu wa sheria na mashirika ya kiraia wanasema mabadiliko hayo ni “kikwazo kikubwa” kwa taifa hilo la kusini mashariki mwa Asia.
“Serikali haiwezi kusimamia maadili. Wajibu wa serikali si mwamuzi kati ya Indonesia ya kihafidhina na huria,” alisema Bivitri Susanti, mtaalam wa sheria kutoka Shule ya Sheria ya Indonesia Jentera.
Naibu spika wa Baraza la Wawakilishi, Sufmi Dasco Ahmad, na Bambang Wuryanto, mkuu wa tume ya bunge inayosimamia marekebisho hayo, waliviambia vyombo vya habari kwamba bunge litafanya kikao cha mashauriano siku ya Jumanne ili kuidhinisha kanuni hiyo mpya.
Mipango ya awali ya kuidhinisha rasimu ya kanuni mpya mnamo Septemba 2019 ilikomeshwa na maandamano ya nchi nzima. Makumi ya maelfu ya waandamanaji waliingia barabarani na maandamano yakageuka kuwa ya vurugu, huku polisi wakitawanya umati wa watu kwa kutumia mabomu ya machozi na maji ya kuwasha.
Marekebisho ya kanuni, ambayo yalianza enzi ya ukoloni, yamefanywa kwa miongo kadhaa. Ingawa mabadiliko hayo yamesababisha maandamano makubwa katika miaka ya hivi karibuni, mwitikio umekuwa kimya zaidi mwaka huu.
Daniel Winarta, mwanafunzi wa Chuo Kikuu cha Indonesia, alikuwa miongoni mwa umati mdogo wa waandamanaji waliokusanyika nje ya bunge katika mji mkuu wa Jakarta siku ya Jumatatu.
“Katika kuishi pamoja, kwa mfano, ni jambo la kibinafsi,” alisema. “Tutaendelea kukataa hii.”
Wakazi wa Indonesia wengi wao ni Waislamu, wakiwa na makundi makubwa ya Wahindu, Wakristo na watu wa imani nyinginezo. Waislamu wengi wa Indonesia wanafuata Uislamu wa wastani, lakini miaka ya hivi karibuni kumeona kuongezeka kwa uhafidhina wa kidini ambao umeingia katika siasa.
Chini ya kanuni iliyorekebishwa, ni jamaa wa karibu tu kama vile mwenzi, mzazi au mtoto wanaweza kuripoti malalamiko yanayohusiana na ngono nje ya ndoa au kuishi pamoja.
Rais pekee ndiye anayeweza kuwasilisha malalamiko yake kuhusu kutukanwa, lakini uhalifu kama huo utaleta kifungo cha miaka mitatu jela.
Itachukua miaka mitatu baada ya kanuni hiyo kuidhinishwa ili ianze kutumika ili kuipa serikali muda wa kuandaa kanuni zinazohusiana.
