Mahakama ya Juu ya Namibia Jumanne ilitambua ndoa za watu wa jinsia moja zilizofungwa nje ya nchi kati ya raia wake nawapenzi wa kigeni. Uamuzi huo unabatilisha uamuzi uliofikiwa mwaka jana na Mahakama Kuu, ambayo ilikataa kukubali ndoa za watu wa jinsia moja zilizofungwa nje ya Namibia.
Raia wawili wa Namibia walikuwa wameomba tafsiri kutoka kwa mahakama baada ya wizara ya mambo ya ndani na uhamiaji kukataa kutoa vibali kwa wapenzi wa jinsia moja wa kigeni ambao walikuwa wamefunga ndoa nje ya nchi.
“Mahakama hii kwa hiyo iligundua kuwa mbinu ya Wizara ya kuwatenga wanandoa, ikiwa ni pamoja na warufani, katika ndoa iliyohitimishwa kihalali… inakiuka haki zote mbili zinazohusiana za utu na usawa wa warufani,” ilisema uamuzi huo.
Annette Seiler, ambaye ameolewa na raia wa Ujerumani Anita Seiler-Lilles, aliwasilisha kesi hiyo pamoja na raia wa Namibia Johann Potgieter na mume wake wa Afrika Kusini, Matsobane Daniel Digashu.
Ndoa zao zilifungwa huko Ujerumani na Afrika Kusini mtawalia
Namibia imeshuhudia msururu wa kesi mahakamani kuhusu haki za wapenzi wa jinsia moja kuoana, kuwa wazazi na kuhama.
Ushoga ni kinyume cha sheria nchini Namibia chini ya sheria ya ulawiti iliyotekelezwa mwaka wa 1927 wakati wake chini ya utawala wa Afrika Kusini.
Afrika Kusini, chini ya katiba yake ya kiliberali ya baada ya ubaguzi wa rangi, ndiyo taifa pekee la Afrika linaloruhusu ndoa za mashoga, zilizohalalishwa mwaka 2006.
Mnamo Machi mwaka huu, mahakama hiyo kuu ilibatilisha uamuzi wa mahakama ya chini wa kumpa uraia mtoto wa kiume wa umri wa miaka minne wa wanandoa wa jinsia moja ambaye alizaliwa katika nchi jirani ya Afrika Kusini kwa njia ya uzazi.
