Kiongozi wa Azimio Raila Odinga amemtaka Rais William Ruto kuomba msamaha kutoka kwa Wakenya kutokana na wasiwasi uliosababishwa na Mswada wa Fedha wa 2023.
Raila alisema Rais anafaa kuondoa Mswada wa Fedha wa 2023 kwa sababu Wakenya watateseka iwapo utapitishwa.
“Tunamwomba Ruto ajinyenyekeze, aondoe Mswada huu, aombe msamaha na kuomba Wakenya msamaha kwa wasiwasi uliojitokeza, kisha aanze upya,” akasema.
Kiongozi huyo wa Azimio, alipokuwa akihutubia wanahabari siku ya Alhamisi, alitoa matakwa kwa Ruto kuhusu mswada huo.
Tayari Mswada huo upo Bungeni ukisubiri uamuzi wa Wabunge.
Raila anamtaka Ruto akome kuwalemea Wakenya na badala yake azingatie kupunguza gharama ya maisha.
“Katika Muswada unaopendekezwa, bajeti ya afya inakua kwa Sh35 bilioni katika ngazi ya kitaifa, lakini afya ni kazi ya ugatuzi,” alisema.
Anamtaka Ruto kupitisha bajeti isiyo na msingi na kuacha kuchukua bajeti ya awali kama msingi.
Raila alisema Rais anafaa kukomesha urudufu wa majukumu ya kaunti.
Mkuu huyo wa upinzani aliongeza kuwa kila bajeti lazima ianzie chini ambapo kila kitu kinapaswa kuhalalishwa.
Alisema Ruto hafai kukuza saizi ya bajeti bali kuikata na kuishi kulingana na mahitaji miongoni mwa matakwa mengine.
Siku ya Jumatano, Raila alisema Wakenya wanapaswa kujiandaa kurejea maandamano ya kila wiki.
Alisema akitolea mfano kushindwa kwa serikali ya Kenya Kwanza kusikiliza kero zao na kushusha gharama ya maisha.
“Wakenya wanaumia. Wanateseka. Waliingia mamlakani kupitia mlango wa nyuma wakati hawakuwa tayari kutawala na sasa wanataka kumwaga uzembe wao kwa Wakenya maskini,” Raila alisema.
