Mnamo Julai 2025, Tanzania ilitangaza Amri ya Leseni za Biashara (Zuio la Shughuli za Kibiashara kwa Wasio Raia), hatua iliyolenga kuzuia raia wa kigeni kushiriki katika biashara ndogo ndogo ambazo serikali iliona zinaweza kufanywa na Watanzania bila hitaji la utaalamu wa kimataifa.
Biashara kama uuzaji wa bidhaa kwa rejareja, huduma za uwakala wa fedha kupitia simu, ufundi wa vifaa vya kielektroniki, uchimbaji mdogo wa madini, na uongozi wa watalii ziliwekwa chini ya marufuku hiyo.
Sababu kuu ya kuweka zuio hilo ilikuwa kulinda ajira na kipato cha wazawa, hasa vijana, ambao walikuwa wakilalamikia ushindani usio wa haki kutoka kwa raia wa kigeni katika sekta hizo.
Serikali ya Tanzania ilisisitiza kuwa hatua hiyo ilikuwa sehemu ya mkakati wa kuimarisha uchumi wa ndani na kuhakikisha kuwa Watanzania wanapata fursa za kujiendeleza kupitia biashara zinazoweza kufanywa bila hitaji la mitaji mikubwa au utaalamu wa kipekee.
Hata hivyo, marufuku hayo yalizua wasiwasi miongoni mwa wafanyabiashara wa Kenya walioko Tanzania, na kupelekea mazungumzo ya pande mbili kati ya serikali hizo.
Kwa sasa Tanzania imewahakikishia maafisa wa Kenya kuwa biashara za Wakenya hazitaathiriwa na agizo hilo, na kwamba waliokuwa tayari wakifanya shughuli zao wataendelea bila usumbufu.
