Waziri Mkuu wa Ukraine Denys Shmygal Jumatatu tarehe 17 Oktoba alisema kuwa mashambulizi ya Urusi yamepiga miundombinu muhimu katika mikoa mitatu, na kuangusha umeme kwa mamia ya miji na vijiji kote nchini.

“Magaidi wa Urusi kwa mara nyingine walishambulia miundombinu ya nishati ya Ukraine katika mikoa mitatu,” Shmygal alisema.

“Mashambulizi matano ya ndege zisizo na rubani yalirekodiwa huko Kyiv. Vituo vya nishati na jengo la makazi viliharibiwa,” aliongeza.

Alisema Urusi pia imefanya mashambulizi ya roketi dhidi ya “miundombinu muhimu” katika mkoa wa kati wa Dnipropetrovsk na eneo la Sumy mashariki mwa nchi hiyo. 

“Mamia ya makazi yalikatwa kutokana na shambulio hilo,” aliongeza.

“Huduma zote (za serikali) zinafanya kazi ya kurekebisha madhara ya makombora na kurejesha usambazaji wa umeme.”

Shmygal aliwahimiza Waukraine kupunguza matumizi yao ya umeme, hasa wakati wa saa za kilele.

Ofisi ya rais imesema mashambulizi ya makombora ya Urusi dhidi ya miundombinu muhimu yamesababisha vifo vya watu kadhaa na kujeruhiwa.

Na huko Dnipropetrovsk, makombora matatu ya Urusi yalidunguliwa lakini mengine yaligonga vituo vya nishati.