Umoja wa Mataifa umewataka viongozi wa Somalia kutimiza makubaliano ya ratiba mpya ya uchaguzi baada ya uchaguzi huo kucheleweshwa mara kwa mara na kusababisha mzozo hatari wa kisiasa.
Chini ya makubaliano yaliyotangazwa Jumapili jioni baada ya mazungumzo kati ya Waziri Mkuu Mohamed Hussein Roble na viongozi wa majimbo, uchaguzi wa wabunge ambao ulipaswa kukamilika mwaka jana sasa unapaswa kukamilika ifikapo Februari 25.
Mgogoro huo wa uchaguzi umezua mzozo mkali wa madaraka kati ya Roble na Rais Mohamed Abdullahi Mohamed, anayejulikana zaidi kama Farmajo, ambao ulitishia uthabiti wa taifa hilo la Pembe ya Afrika.
Ujumbe wa Umoja wa Mataifa nchini Somalia ulisema kwenye Twitter kuwa “umefurahishwa” na maafikiano yaliyofikiwa wakati wa mikutano ya Baraza la Kitaifa la Ushauriano.
Lakini iliongeza: “Kipaumbele sasa ni kutekeleza maamuzi haya ili kufikia matokeo ya kuaminika na yanayokubalika na watu wengi kwa tarehe mpya.
Umoja wa Mataifa unawahimiza viongozi wa kisiasa wa Somalia kuendelea na ushirikiano, kuepuka uchochezi unaoweza kuhatarisha mivutano mipya au migogoro na kuendelea kulenga katika kutoa mchakato wa uchaguzi unaoaminika kwa manufaa ya Wasomali wote.”
Jumuiya ya kimataifa ilikuwa na hofu kwamba kucheleweshwa kwa uchaguzi na mzozo kati ya Roble na Farmajo unaweza kuiingiza nchi kwenye mgogoro wakati nchi inapoendelea kupambana na uasi mbaya unaofanywa na wanajihadi wa Al-Shabaab.
Somalia pia inakabiliwa na ukame mkali ambao kwa mujibu wa Umoja wa Mataifa umesababisha njaa kali.
Uongozi wa miaka minne wa Farmajo ulimalizika mwezi Februari mwaka jana, lakini uliongezwa na bunge mwezi Aprili, na kusababisha mapigano mabaya katika mitaa ya Mogadishu.
Roble kisha akapanga ratiba mpya ya uchaguzi, lakini katika miezi iliyofuata, ushindani mkali kati ya Roble na Farmajo ulivuruga mchakato huo tena.
Katika mzozo wa hivi punde, Farmajo alimsimamisha kazi Roble, lakini waziri mkuu alikaidi agizo hilo, akimshutumu rais kwa kukiuka katiba.
Uchaguzi wa nchi unafuata mtindo tata usio wa moja kwa moja.
Takriban wajumbe wa koo 30,000 wamepewa kazi ya kuchagua wabunge 275 wa bunge la chini huku mabunge ya majimbo yakiwachagua maseneta wa baraza la juu, mchakato ambao sasa umekamilika.
Mara baada ya uchaguzi wa bunge la chini kukamilika, mabunge yote mawili humpigia kura rais ajaye.
