Serikali za Kenya na Tanzania zilikashifu KLM siku ya Jumamosi kwa kueneza madai “yasiyo na msingi” baada ya shirika hilo la ndege kuchapisha onyo la ushauri wa kukatizwa kwa usafiri kutokana na kudaiwa kuwa na machafuko ya wenyewe kwa wenyewe katika nchi hizo mbili.
KLM ilisema kuwa “machafuko ya raia” kati ya Ijumaa na Jumatatu yanaweza kulazimisha safari za ndege kughairiwa, kabla ya kurekebisha tahadhari yake ili kurejelea “tishio la ndani nchini Tanzania” ambalo halijabainishwa.
Waziri wa Uchukuzi wa Kenya Kipchumba Murkomen alisema Jumamosi kwamba alipinga shirika la ndege kuhusu “taarifa hii isiyo na msingi, ya uwongo, isiyojali na ya kupotosha ambayo inaipa Kenya picha mbaya.”
“Tutaendeleza mjadala huu kupitia njia za kidiplomasia,” alionya katika taarifa.
Serikali ya Tanzania pia ilikosoa ushauri huo, huku waziri wa Ujenzi na Uchukuzi Makame Mbarawa akisema hakuna ukweli wowote kuhusu madai hayo.
“Taarifa hii haina msingi, ya kutisha, haina maana na haina hisia na imesababisha hofu isiyo ya lazima,” alisema katika taarifa yake na kuwataka wasafiri kupuuza ushauri huo.
Shirika hilo la ndege, ambalo linamilikiwa na Air France KLM, liliomba msamaha kwa serikali ya Kenya siku ya Jumamosi, likisema ushauri huo “umekusudiwa kwa wateja wetu nchini Tanzania pekee”.
Lakini tahadhari hiyo “ilishirikiwa kimakosa pia na wateja wetu nchini Kenya”, ilisema.
Air France-KLM ina asilimia 7.8 ya hisa katika shirika la ndege la Kenya, Kenya Airways, huku serikali ikimiliki asilimia 48.9.
