Kundi linalowawakilisha manusura wa mauaji ya kimbari ya Rwanda Jumanne lilielezea hasira na kusikitishwa na uamuzi wa mahakama ya rufaa ya Umoja wa Mataifa kwamba mshukiwa anapaswa kuzingatiwa kwa haraka ili kuachiliwa huru baada ya kutangazwa kuwa hafai kushtakiwa.
Chama cha Ibuka kinachowakilisha manusura kilikosoa uamuzi huo katika kesi ya mfanyabiashara wa zamani Felicien Kabuga, anayetuhumiwa kuanzisha shirika la utangazaji la chuki ambalo lilichochea mauaji ya 1994 ya karibu watu 800,000.
Walionusurika “wana hasira sana na wamekatishwa tamaa,” Naphtali Ahishakiye, katibu mtendaji wa kikundi alisema akiongezea kuwa iliweka “mfano wa kusikitisha.”
Mnamo Juni, majaji walipata kuwa Kabuga hakuwa sawa vya kutosha kushtakiwa lakini waliamua kwamba bado anafaa kufanyiwa mchakato wa kisheria uliotenguliwa bila hukumu.
Majaji wa rufaa walikataa hilo Jumatatu, wakisema mahakama ya chini ilifanya “kosa la kisheria” na uamuzi wa Kabuga, ambaye ana umri wa miaka 88 kwa mujibu wa maafisa lakini anadai kuwa na umri wa miaka 90, unapaswa kuzingatiwa kwa haraka ili kuachiliwa.
Alikamatwa mjini Paris 2020 baada ya kukimbia kwa miongo miwili, Kabuga aliyekuwa akitumia kiti cha magurudumu alifikishwa mahakamani Septemba iliyopita na akakana mashtaka.
Waendesha mashitaka wanamshutumu Kabuga, ambaye wakati mmoja alikuwa mmoja wa watu tajiri zaidi wa Rwanda, kwa kuwa msukumo wa Radio-Television Libre des Mille Collines (RTLM), ambayo iliwataka Wahutu kuwaua Watutsi kwa mapanga.
Lakini majaji walisema mnamo Juni kwamba wataalam wa matibabu sasa wamegundua kuwa ana “upungufu mkubwa wa akili”.Mahakama ilisimamisha kwa mara ya kwanza kesi hiyo mwezi Machi kutokana na matatizo ya kiafya, baada ya kutupilia mbali maombi ya mawakili wa utetezi wa Kabuga ya kutaka atangazwe kuwa hafai kusikizwa.
