Kundi la Watanzania limewasilisha kesi katika mahakama ya Canada. dhidi ya kampuni kubwa ya uchimbaji madini ya Barrick Gold, kwa ukiukaji mkubwa wa haki za binadamu.
Raia hao 21 waliwasilisha madai hayo katika Mahakama ya Juu ya Haki mjini Ontario.. Walishutumu Barrick Gold, mchimbaji dhahabu wa pili kwa ukubwa duniani kwa kuhusika katika mauaji ya kiholela yaliyofanywa na polisi wanaolinda kituo chake cha North Mara, kilichoko takriban kilomita 30 kutoka mpaka na Kenya.
Watanzania hao ambao ni wa jamii ya Wakurya wanawakilishwa na kampuni za uwakili za Camp Fiorante Matthews Mogerman LLP na Waddell Phillips. Kesi hizo ni madai ya vifo vitano, matukio matano ya mateso, na zaidi, majeruhi watano kutokana na kupigwa risasi na “polisi wa mgodi”.
Pia inadai kuwa Barrick “imekuwa na udhibiti mzuri na wa vitendo” dhidi ya polisi wa Tanzania waliopo mgodini, na kwamba mikataba ya usalama ya kampuni hiyo na polisi, inawafanya kuwa “kikosi cha usalama cha kibinafsi na chenye silaha kali” cha mgodi huo.
“Hatua ya walalamikaji, ambao ni watu wa jamii ya Wakurya wa asili ambao vijiji vyao vya kaskazini mwa Tanzania mgodi huo umejengwa, inahusu mauaji ya kikatili, kupigwa risasi na mateso ambayo wanadai yalifanywa na polisi wanaolinda mgodi,” RAID. shirika la uangalizi, ilisema katika taarifa siku ya Jumatano.
Mgodi wa North Mara unajulikana kwa ukatili dhidi ya Wakurya waliokuwa wakiishi, kulima na kuchimba ardhi ambayo mgodi wa Barrick umejengwa. Mapema mwezi huu, RAID iliripoti kuwa mgodi wa North Mara unashika nafasi ya moja ya migodi hatari zaidi ya kiviwanda barani Afrika kwa vurugu zinazohusiana na usalama, na watu wasiopungua 77 waliuawa na 304 kujeruhiwa, wengi mara kadhaa, na polisi wanaohusika na usalama wa mgodi. Matukio mengi haya yalitokea baada ya Barrick kupata mgodi huo mwaka 2006.
Hii ni kesi ya kwanza kuwasilishwa dhidi ya Barrick Gold katika mahakama ya Kanada kwa madai ya ukiukaji wa sheria nje ya nchi. Inakuja baada ya mahakama kuu ya nchi hiyo mnamo 2019 kuamua kwamba kampuni ya Kanada Nevsun Resources Ltd inaweza kushtakiwa nchini Canada kwa madai ya kazi ya kulazimishwa na ukiukwaji mwingine katika mgodi huko Eritrea.
