Chama kikuu cha upinzani nchini Nigeria siku ya Jumamosi kilimteua makamu wa rais wa zamani Atiku Abubakar kuwa mgombea wake katika uchaguzi wa 2023 kuchukua nafasi ya Rais Muhammadu Buhari.
Abubakar, mwenye umri wa miaka 75, Mwislamu wa kaskazini na mwanasiasa wa chama cha People’s Democratic Party au PDP, amewania mara kadhaa tiketi ya urais wa nchi hiyo yenye watu wengi zaidi barani Afrika.
Alishinda kura nyingi kutoka kwa wajumbe wa chama cha PDP waliopiga kura katika uchaguzi wa mchujo huko Abuja siku ya Jumamosi, na kumshinda Gavana wa Jimbo la Rivers Ezenwo Nyesom Wike.
“Leo, tunatengeneza historia nyingine, historia ambayo tunaamini italeta mabadiliko ya kimsingi,’Abubakar aliwaambia wafuasi katika uwanja wa kitaifa mjini Abuja ambapo mchujo ulifanyika.
“PDP, PDP, nguvu kwa watu.”
Katika hotuba yake alikishutumu chama cha Buhari kwa kuigawanya Nigeria kwa misingi ya kikabila na kidini na kuahidi kukabiliana na ukosefu wa usalama na matatizo ya kiuchumi ya nchi hiyo.
PDP na chama tawala cha Buhari cha All Progressives Congress (APC) vyote viliratibiwa wikendi hii kuchagua wagombeaji watakaoshiriki kinyang’anyiro cha urais mwezi Februari.
Lakini siku moja kabla ya uchaguzi wake wa mchujo kuanza, APC ilitangaza kwamba imeahirisha kongamano la chama chake kutoka Juni 6 hadi Juni 8.
Buhari, 79, anaondoka madarakani na Nigeria bado inajitahidi kumaliza mzozo wa zaidi ya muongo mmoja wa wanajihadi kaskazini mashariki na wimbi la ujambazi na utekaji nyara mkubwa kaskazini magharibi mwa nchi hiyo.
Nchi hiyo ambayo ni yenye uchumi mkubwa zaidi barani Afrika pia bado inaendelea kupata nafuu kutokana na athari za janga la coronavirus na athari za vita vya Ukraine ambavyo vimeongeza bei ya mafuta na chakula katika bara zima.
Chama cha PDP kiliiongoza Nigeria kwa muongo mmoja na nusu kabla ya rais wake wa wakati huo Goodluck Jonathan kuondolewa madarakani na muungano wa APC mwaka 2015 ili kumuweka Buhari madarakani.
Atiku ni mkongwe wa siasa za Nigeria, alikuwa makamu wa rais wa Olusegun Obasanjo Nigeria iliporejea kwa demokrasia baada ya utawala wa kijeshi mwaka wa 1999.
Alishindwa na Buhari katika uchaguzi wa 2019.
Lakini maisha yake ya muda mrefu ya kisiasa pia yametawaliwa na madai ya ufisadi, ingawa kila mara alikanusha makosa yoyote.
Alikuwa mkuu wa huduma ya forodha wakati wa enzi ya jeshi kabla ya kuingia katika sekta ya kibinafsi akiwekeza katika mafuta na kilimo na kuwa mmoja wa watu tajiri zaidi na mashuhuri wa Nigeria.
APC ilisema kucheleweshwa kwa uamuzi wake wa mchujo kulifuatia uamuzi wa mamlaka ya uchaguzi kuongeza muda wa mwisho wa kuwasilisha majina ya wagombea.
APC haikutoa maelezo zaidi, lakini chama tawala kimekumbwa na mzozo mkali kuhusu nani anafaa kugombea, huku gavana wa zamani wa Lagos Bola Tinubu na Makamu wa Rais wa sasa Yemi Osinbajo wakiwa miongoni mwa wale watakaowania.
Buhari hajaidhinisha mgombea yeyote kumrithi na baadhi ya wachambuzi wanamtarajia kujaribu kumtafuta mteule wa makubaliano ili kuweka vikundi vya APC pamoja kabla ya uchaguzi wa rais na bunge wa Februari 2023.
