Raia wa China amehukumiwa kifungo cha miaka 20 jela kwa kuwatesa wafanyakazi wa mgodi nchini Rwanda baada ya video inayomuonyesha akimchapa viboko mwanamume aliyekuwa amefungwa kwenye msalaba, video hiyo ilisambaa kwenye mitandao ya kijamii.
Sun Shujun, meneja wa mgodi ulioko magharibi mwa nchi hiyo, alitiwa hatiani siku ya Jumanne pamoja na mshirika wake kufuatia kukamatwa kwake Septemba mwaka jana.
“Ni wazi kwamba (Sun) aliwatesa waathiriwa na kutoa adhabu ya viboko kwa nia ovu, na hii ni uhalifu mkubwa,” hakimu Jacques Kanyarukiga aliamua, na kuamuru kutumikia kifungo cha miaka 20 gerezani.
Sun, ambaye alikuwa mahakamani kwa uamuzi huo, alikiri kuwashambulia wafanyakazi wawili, akisema aliwapiga kwa sababu “alikuwa amechoshwa na wao kuiba madini kila mara.”
Meneja huyo mwenye umri wa miaka 43 aliomba kuachiliwa, akisema alikuwa amewafidia wawili hao kwa kulipa jumla ya zaidi ya faranga milioni moja za Rwanda (kama dola 1,000, euro 900) na kutia saini “barua ya upatanisho.”
Hata hivyo, upande wa mashtaka — ambao ulikuwa umemshtaki kwa kuwashambulia watu wanne — ulisema kuwa waathiriwa walikubali malipo “kwa sababu walikuwa na kiwewe na kumuogopa.”
Meneja mwingine katika kampuni hiyo, Ali Group Holding Ltd, alipatikana na hatia ya kumsaidia Sun na kuhukumiwa kifungo cha miaka 12 jela lakini mshtakiwa mwingine hakupatikana na hatia.
Klipu ya sekunde 45 ya tukio moja ilisambazwa sana kwenye Twitter mnamo Septemba, ikimuonyesha Mchina aliyeonekana kuwa na hasira akitumia kamba kumchapa viboko mwanamume aliyekuwa amejikunja chini na amefungwa kwenye nguzo, huku kikundi kidogo cha watu kikitazama.
Mgodi huzalisha cassiterite, madini kuu ya bati.
Baada ya uamuzi wa mahakama katika wilaya ya Rutsiro, Sun — ambaye alikuwa huru kwa dhamana — alifungwa pingu na kuchukuliwa na walinzi.
Ana hadi siku 30 kukata rufaa.
Ubalozi wa China nchini Rwanda ulisema katika taarifa yake kuwa “umezingatia” uamuzi huo.
“Ubalozi huwa unawaomba raia wa China nchini Rwanda kuzingatia sheria na kanuni za nchi hiyo,” ilisema.
“Ubalozi unatoa wito kwa kesi hiyo kushughulikiwa ipasavyo kwa njia ya busara na haki, na kuomba haki halali za raia wa China zilindwe ipasavyo.”
Rwanda na China zina uhusiano mzuri na mwaka jana ziliadhimisha miaka 50 ya uhusiano wa kidiplomasia.