Makamu Mwenyekiti wa CCM Bara, Stephen Wasira amewajibu Mwenyekiti CHADEMA Tundu Lissu na Makamu Mwenyekiti wa chama hicho John Heche waliozungumzia umri wake hivi karibuni.
Akizungumza kwenye mkutano wa hadhara mkoani Geita jana Januari 29, 2025, Wasira amesema umri wake hauathiri uwezo wake wa kufikiri wala kufanya maamuzi sahihi.
“Mimi nina umri mkubwa lakini akili ni za miaka 55. Heche (John) akitaka akaulize madaktari wa India na Muhimbili, wamesema nina akili safi kabisa. Gari ni injini, siyo bodi,” alisema Wasira huku akiwataka wapinzani wake kuzingatia hoja badala ya umri wake.
Wasira ametoa mfano wa Donald Trump, ambaye amechaguliwa kuwa Rais wa Marekani katika uchaguzi wa hivi karibuni, akisema kuwa licha ya umri wake mkubwa, Wamarekani walimchagua kwa sababu ya sera zake na si kwa kuangalia umri wake.
“Heche akitaka ushahidi aende Marekani akawaulize Wamarekani kwanini walimchagua Donald Trump mwenye umri kama wangu na wakamuacha Kamala Harris mwenye miaka 60,” alisisitiza Wasira.
Wasira amechaguliwa kushika nafasi ya Makamu Mwenyekiti wa CCM Bara akiwa na umri wa miaka 80, akichukua nafasi ya mtangulizi wake ambaye aliandika barua ya kujiuzulu nafasi hiyo Abdulrahman Omari Kinana mwenye umri wa miaka 73.
