Watu sita walikufa baada ya mvua kubwa kusababisha mporomoko ya ardhi katika mji mkuu wa Ivory Coast Abidjan, huduma za dharura zilisema Alhamisi.

Watu wazima wanne na watoto wawili waliuawa, na watu wawili wamelazwa hospitalini na majeraha, kikosi cha zima moto kilisema katika taarifa iliyotumwa kwenye mtandao wa kijamii.

Waziri Mkuu Patrick Achi alitembelea eneo la ajali, iliyotokea Mossikro, kitongoji katika wilaya ya magharibi ya Attecoube.

Maporomoko ya ardhi wakati wa msimu wa mvua ni hatari inayojulikana Abidjan, jiji linalokuwa kwa kasi lenye watu milioni tano.

Mamlaka mapema mwezi huu ilianzisha operesheni ya kuharibu makazi ya vibanda vilivyojengwa katika maeneo hatarishi.

Wale waliolazimishwa kutoka nje ya nyumba zao chini ya mpango huu wanahifadhiwa kwa muda, serikali inasema.

“Mossikro… imetambuliwa kama eneo lililo hatarini, na tangu Machi na Aprili, watu huko wameshauriwa kwamba wanapaswa kuondoka” wizara ya maji ilisema katika taarifa yake.

Kushindwa au kuchelewa kutii onyo hilo ni kujitafutia mauti.

Ajali za awali zilisababisha maisha ya watu 18 mnamo Juni 2018 na 13 mnamo Juni 2020.