![](https://mwanzotv.com/wp-content/uploads/2023/06/mild.jpg)
Rais wa Uganda Yoweri Museveni ametoa taarifa kuhusu hali yake ya kiafya baada ya kuambukizwa virusi vya Covid-19 siku mbili zilizopita.
Museveni ambaye tangu wakati huo amejitenga alisema siku ya Ijumaa daktari wake alimfahamisha kuwa ugonjwa huo ni mdogo.
Alisema kwa mujibu wa daktari wake wa muda mrefu, Diana Atwiine, hayo ni maambukizo madogo na yanapaswa kudhibitiwa kwa uangalifu kwa kutumia vitamini C na vitamini vingine.
“Atwiine alipotangaza hali yangu ya corona juzi, mimi ndiye niliyemwambia afanye hivyo. Nilikuwa bado na masuala mengine,” alisema.
Rais alisema atapimwa tena baada ya siku mbili zaidi.
Alisema katika siku yake ya pili ya kuishi na virusi hivyo, alihisi usingizi sana mwendo wa saa 11 asubuhi lakini alikuwa amelala vizuri usiku uliopita.
“Kwa hivyo, nililala fofofo hadi saa 3 usiku,” Museveni alisema.
Alipozinduka, aliweza kuandika hotuba fupi kwa ajili ya mmoja wa viongozi wa serikali kuisoma Luwero siku ya Ijumaa.
Museveni alihimiza kila mtu apewe chanjo kamili na wazee wapate nyongeza.