Mamlaka nchini Zambia zimefunga mahakama kuu za nchi hiyo Jumatatu, Agosti 24, 2026, na kuzuia ufikiaji wa majengo hayo siku ya mwisho ambayo upinzani ungeweza kuwasilisha pingamizi dhidi ya uchaguzi uliozoaniwa wa mwezi huu.
Waraka kutoka kwa msimamizi mkuu wa idara ya mahakama ulisema: “Kwa sababu za kiusalama, wafanyakazi wote wanashauriwa kutofika kazini leo.”
Msemaji wa polisi Godfrey Chilabi aliambia shirika la Habari la Reuters kuwa tathmini za kiusalama zinaendelea, na alikataa kutoa maelezo zaidi. Msemaji wa idara ya mahakama hakuweza kupatikana.
Kiongozi wa upinzani Brian Mundubile alisema wiki iliyopita kuwa alipanga kuwasilisha malalamiko katika Mahakama ya Katiba kupinga matokeo ya uchaguzi wa Agosti 13, ambapo alishika nafasi ya pili nyuma ya Rais Hakainde Hichilema. Mwisho wa kuwasilisha malalamiko hayo ni siku saba baada ya matokeo kutangazwa, ambao unaisha alfajiri ya Jumanne.
Katika majengo ya Mahakama ya Juu jijini Lusaka, ambayo pia inajumuisha Mahakama ya Katiba, milango yote ilifungwa na polisi walionekana ndani.
Hichilema alitangazwa mshindi kwa takriban asilimia 60 ya kura. Ripoti mbili za waangalizi huru zilionyesha wasiwasi kuhusu hesabu ya kura, madai ambayo rais ameyakanusha.
Baada ya kukamatwa kwa washirika wake kadhaa, Mundubile aliitwa na polisi wiki iliyopita kwa mahojiano kuhusiana na madai ya vitisho kwa usalama wa taifa, ambayo anasema yamebuniwa.
Wachambuzi na wanasheria wa haki za binadamu walisema wanashuku anaweza kuzuiwa kuwasilisha malalamiko yake, ingawa chama cha Hichilema kilisema Mundubile yuko huru kutumia njia za kisheria zilizopo.
“Tunajitahidi kwa hali na mali kuhakikisha malalamiko yanawasilishwa, lakini tutaona itakavyokuwa,” alisema Rais wa Chama cha New Heritage, Chishala Kateka, ambaye chama chake ni sehemu ya muungano wa upinzani wa Mundubile.
