IMF yaongezea Somalia muda wa ufadhili kufuatia uchaguzi

Mohamud, aliwahi kuwa rais kati ya 2012 na 2017, ameahidi kulibadilisha taifa hilo lililokumbwa na machafuko kuwa nchi ya amani

0
Hassan Sheikh Mohamud, Rais mpya wa Somalia

Shirika la Fedha la Kimataifa IMF limekubali kuongeza muda wa kifurushi muhimu cha msaada kwa Somalia, afisa mkuu alisema, kufuatia uchaguzi wa rais uliochelewa kwa muda mrefu.

Msaada wa miaka mitatu wa dola milioni 400 kutoka kwa IMF ulikuwa umepangwa kuisha Mei 17 ikiwa utawala mpya hautakuwepo kufikia wakati huo, na ucheleweshaji wa chaguzi nyingi uliongeza msukosuko wa nchi hiyo yenye deni kubwa.

Lakini wiki iliyopita Bodi ya Utendaji ya IMF ilikubali ombi la serikali ya Somalia la kuongezewa muda wa miezi mitatu hadi Agosti 17, na kuipa muda serikali ya Rais mteule Hassan Sheikh Mohamud kuchunguza na kuidhinisha mageuzi yaliyopangwa.

“Ongezeko hilo litatoa muda unaohitajika kuthibitisha maelewano ya kisera na serikali mpya na kuthibitisha uhakikisho wa ufadhili na washirika wa maendeleo,” Laura Jaramillo Mayor, mkuu wa ujumbe wa IMF nchini Somalia, aliiambia AFP katika barua pepe iliyotumwa mwishoni mwa Alhamisi.

Washirika wa kimataifa wa Somalia wamekaribisha kuchaguliwa kwa Rais Mohamud, huku wengi wakitumai kuwa uchaguzi wake utakomesha mzozo wa muda mrefu wa kisiasa ambao umeifanya  serikali kutozingatia vitisho vingine, ikiwa ni pamoja na uasi mkali na ukame mbaya.

Chini ya masharti ya mpango wa IMF, deni la Somalia linaweza kushuka hadi dola milioni 557 mapema mwaka 2023, Jaramillo aliiambia AFP katika mahojiano mwezi Februari.

Hilo lingeruhusu Mogadishu kuvutia ufadhili zaidi kutoka kwa washirika wa kimataifa na kusaidia kuendeleza sekta yake ya kibinafsi.

Moja ya nchi maskini zaidi duniani, ikiwa na zaidi ya asilimia 70 ya wakazi wake wakiishi chini ya dola 1.90 kwa siku, Somalia inajitahidi kujikwamua kutoka kwa miongo kadhaa ya vita vya wenyewe kwa wenyewe na pia imekuwa ikipambana na waasi wa Kiislamu wa Al-Shabaab kwa miongo kadhaa.

Kila mwezi, serikali ya shirikisho hukosa dola milioni 10 kulipia gharama muhimu kama vile mishahara ya wafanyikazi.

Wakati huo huo ukame mkali unatishia kusababisha mamilioni ya watu kukumbwa na baa la njaa, huku mashirika ya Umoja wa Mataifa yakionya kuhusu janga la kibinadamu iwapo hatua za mapema hazitachukuliwa.

Mohamud — ambaye aliwahi kuwa rais kati ya 2012 na 2017 na ni kiongozi wa kwanza wa Somalia kushinda muhula wa pili — ameahidi kulibadilisha taifa hilo lililokumbwa na machafuko la Pembe ya Afrika kuwa “nchi ya amani na inaoishi kwa amani na mataifa mengine.

In this article

Join the Conversation