Inspekta Jenerali wa Polisi nchini Kenya, Douglas Kanja, amefika mbele ya Mahakama Kuu kufuatia wito wa mahakama, kujibu maswali kuhusu kutoweka kwa mwanaharakati wa Tanzania, Twaha Mwaipaya.
Akijibu maswali mbele ya Jaji Alexander Muteti, Kanja aliieleza mahakama kuwa anafahamu kuhusu kesi hiyo, lakini akasisitiza kuwa Mwaipaya hayuko chini ya ulinzi wa polisi popote Kenya.
“Mheshimiwa Jaji, ningependa kuifahamisha mahakama hii kuwa hatuna mtu huyo chini ya ulinzi wetu katika eneo lolote la Jamhuri ya Kenya,” alisema Kanja.
Afisa huyo mkuu wa polisi alisema hana taarifa zozote zinazoonyesha kuwa Mwaipaya aliwahi kukamatwa na maafisa wa polisi wakati wowote.
Hata hivyo, alikiri kuwa kulikuwa na taarifa iliyowasilishwa katika Kituo cha Polisi cha Ruai kuhusu suala hilo.
“Mheshimiwa Jaji, ninafahamu kuwa taarifa kuhusu suala hili iliwasilishwa katika Kituo cha Polisi cha Ruai,” alisema.
Kuhusu uchunguzi wa kisa hicho, Kanja alisema uchunguzi unaendelea na kumfahamisha jaji kuwa afisa anayesimamia uchunguzi huo alikuwa pia mahakamani.
Kanja alisisitiza kuwa maafisa wa polisi hawakumkamata Mwaipaya wakati wowote, hivyo basi hangeweza kutolewa mikononi mwao kwa kuwa hakuwa chini ya ulinzi wao.
Akijibu madai kwamba polisi walikuwa wamezembea katika kushughulikia suala hilo, Kanja alitetea idara ya polisi, akisema kuwa kila ripoti inayowasilishwa katika kituo chochote cha polisi au kwa afisa yeyote wa polisi huwa inafanyiwa uchunguzi kwa utaratibu unaofaa.
Aidha, alikanusha madai kwamba maafisa wa polisi wanahusika na visa vya watu kutekwa nyara nchini.
“Hapana kabisa. Sisi hatuteki watu na kuwafanya kutoweka,” alisema Kanja.
Aliongeza kuwa kitendo chochote cha utekaji nyara kinapaswa kuchukuliwa kama uhalifu.
Hapo awali, mnamo Oktoba 30, 2026, Jaji Muteti alikuwa ameamuru polisi kumfikisha Twaha Mwaipaya mahakamani akiwa hai au amefariki kufikia Novemba 2, 2026, pamoja na hati halisi ya kizuizini, huku polisi wakitakiwa kueleza sababu zinazofaa za kutomwachilia huru mara moja iwapo alikuwa chini ya ulinzi wao.
Kesi hiyo ilitajwa tena Jumatatu, huku kufika kwa Inspekta Jenerali wa Polisi mahakamani kukiwa sehemu ya utekelezaji wa amri za Habeas Corpus, zinazolenga kuhakikisha mtu aliyedaiwa kuzuiliwa kinyume cha sheria anafikishwa mahakamani ili kubaini aliko na uhalali wa kuzuiliwa kwake.
Mwaipaya aliripotiwa kutekwa nyara mnamo Oktoba 25, 2026, katika eneo la Kamulu, Kaunti ya Machakos nchini Kenya.
