Kiongozi wa upinzani nchini Uganda Robert Kyagulanyi almaarufu Bobi Wine alisema Alhamisi alikuwa chini ya kizuizi cha nyumbani baada ya kukamatwa na maafisa wa usalama alipokuwa akirejea nyumbani kutoka safari ya nje ya nchi.
Wine, mwanamuziki aliyegeuka kuwa mwanasiasa ambaye alichuana na Rais mkongwe Yoweri Museveni katika uchaguzi uliopita wa 2021 nchini Uganda, amekamatwa mara nyingi.
“Walinikamata kinyume cha sheria kama mlivyoona na tunapozungumza hivi sasa niko chini ya kizuizi cha nyumbani. Wanajeshi na polisi wako kila mahali,” Wine slisema akiwa nyumbani kwake.
Pia alisema wafuasi wake 300 wamekamatwa, lakini hakutoa maelezo zaidi.
Polisi walikanusha kuwa Wine alikamatwa, wakisema “walimsindikiza” kutoka Uwanja wa Ndege wa Kimataifa wa Entebbe hadi nyumbani kwake.
“Tunataka kujulisha umma kwamba rais wa NUP, Mhe. Kyagulanyi Robert alifaulu kusindikizwa na timu yetu ya usalama kutoka Entebbe hadi nyumbani kwake Magere,” Jeshi la Polisi la Uganda lilisema kwenye mtandao wa X.
“Alifika nyumbani kwake mwendo wa saa 11:20 asubuhi, na yuko pamoja na familia yake na marafiki. Puuza uvumi wa kukamatwa kwake na watu wanaoeneza propaganda.”
Video iliyotumwa na Jukwaa lake la Umoja wa Kitaifa (NUP) ilionyesha akinyakuliwa na maafisa wa usalama mara tu aliposhuka kutoka kwenye ndege huku mwanamume akipiga kelele mara kwa mara: “Unampeleka wapi, unampeleka wapi.”
Wafuasi wa Bobi Wine walikuwa wamepanga kuandamana naye kwa wingi hadi nyumbani kwake, lakini polisi walikuwa wamesema kuwa mkusanyiko huo haukuwa halali.