Rais Ruto, pamoja na kiongozi wa Muungano wa Azimio La Umoja na kiongozi wa upinzani nchini Kenya Raila Odinga, walikutana na Rais wa Uganda Yoweri Museveni Jumatatu tarehe 26 Februari 2024, nyumbani kwake Kisozi, nchini Uganda.
Mkutano huo wa kushtukiza uliwaacha Wakenya wengi wakijiuliza ajenda ni nini, kufuatia mzozo wa kisiasa unaoendelea kati ya Ruto na Raila, pamoja na mzozo wa hivi majuzi kati ya Kenya na Uganda kuhusu uagizaji wa mafuta ya petroli.
Rais Ruto Jumatatu alitangaza kwenye ukurasa wake wa X kuhusu mkutano huo “Kenya na Uganda zimejitolea kuimarisha uhusiano wa muda mrefu wa kidiplomasia na kiuchumi kati ya nchi zetu mbili. Uhusiano huu ni pamoja na kuleta mataifa yote saba ya Jumuiya ya Afrika Mashariki karibu katika lengo lao kuu la kuunda Shirikisho la Kisiasa la Afrika Mashariki,” Rais Ruto aliandika.
Aliendelea: “Nilikuwa na furaha kukutana na Rais Yoweri Museveni nyumbani kwake Kisozi nchini Uganda. Tulijadili masuala muhimu yanayoathiri nchi zetu mbili kama vile nishati na petroli.
“Pia kilichojadiliwa ni kutangazwa kugombea kwa aliyekuwa Waziri Mkuu wa Kenya Raila Odinga kwa uenyekiti wa Tume ya Umoja wa Afrika,” Ruto aliongeza.
Rais Museveni pia alitoa tangazo hilo, na kuthibitisha mkutano huo. “Nilifurahi kukutana na Rais Ruto na Mhe. Odinga katika shamba langu huko Kisozi alasiri ya leo. Tulijadili maswala yenye maslahi kati ya nchi zetu mbili. Ninawakaribisha,” Museveni aliandika.
Tangu wakati huo Odinga ametoa shukrani kwa viongozi hao wawili kwa kuunga mkono kuwania kwake. “Ninamshukuru sana Rais Museveni kwa kuidhinisha kwa dhati ugombea wangu na kwa Rais Ruto kwa kuunga mkono kikamilifu,” alisema Odinga.
Rais Ruto alieleza kuwa uhusiano kati ya Kenya na Uganda ni sehemu ya mkakati mpana unaolenga kukuza umoja zaidi kati ya mataifa yote saba ya Jumuiya ya Afrika Mashariki katika kuunda Shirikisho la Kisiasa la Afrika Mashariki.
Katika kikao na wanahabari kilichofanyika Alhamisi tarehe 15 Februari, Odinga alitangaza rasmi nia yake katika uenyekiti wa Tume ya Umoja wa Afrika (AU).
“Ikiwa uongozi wa Afrika unatamani huduma zangu, nimejitayarisha na kujitolea kutumikia bara hili. Niko tayari kufuata uenyekiti wa Umoja wa Afrika,” alithibitisha Odinga.